Lores: “Non se me ocorre mellor homenaxe que inmortalizar á señora Lola custodiando Pasarón”
O alcalde presidiu o acto formal de inauguración do mural realizado polo pintor Yoseba Muruzábal no que se homenaxeou a memoria de Dolores Calviño
O mural en homenaxe á señora Lola situado nunha medianeira diante de Pasarón foi inaugurado esta tarde nun acto moi reducido que estivo presidido polo alcalde, Miguel Anxo Fernández Lores, e no que interviron o pintor Yoseba Muruzábal, a presidenta do Pontevedra CF, Lupe Murillo, o ex-xogador Modesto Martínez Pillado, a coordinadora do programa A memoria das mulleres, Montse Fajardo, a sobriña da señora Lola, Maruja Calviño Cereijo, e o concelleiro de Urbanismo e Memoria Histórica, Xaquín Moreda.
“Non se me ocorre mellor homenaxe que inmortalizar á señora Lola, con ese sorriso de satisfacción e esa mirada agarimosa, custodiando o estadio que ela converteu na súa casa e o equipo que un día foi a súa familia” asegurou o alcalde durante a súa intervención.
Fernández Lores indicou que o “carisma” da homenaxeada “procedía da súa humildade, da súa capacidade de traballo, e da súa paixón e amor polo club. E iso é o que eu quixera destacar hoxe aquí da señora Lola: a súa capacidade para inspirar”. Ao tempo que salientou que “a señora Lola formou parte do Pontevedra nunha das mellores épocas da súa historia e, o máis importante, chegou a converterse nun emblema do club sen necesidade de saltar ao campo para marcar goles”.
O alcalde agracedeu a todas as persoas que contribuíron a facer posible o mural e especialmente ao seu autor de quen afirmou que “se neste país hai un pintor que xa ten demostrado amplamente a súa capacidade para homenaxear nos seus murais ás mulleres humildes e traballadoras desta terra, ese é Yoseba Muruzábal. Tivemos a sorte de contar co seu talento e coa súa habilidade artística para plasmar desta forma tan exquisita que podemos ver aquí á señora Lola e a súa relación co Pontevedra.
Pola súa banda, Yoseba Muruzábal recoñeceu que este traballo “supuxo un grandísimo esforzo e custoume moitísimo traballo” pero como contraparte salientou que “tiven moitísimo apoio e moitísimo impulso desde a rúa, porque todo o mundo aquí a coñecía e todo o mundo tiña algo bo que dicir dela”. A sobriña de Dolores Calviño, moi emocionada, agracedeu o mural cunha única frase: “gracias a todos porque está preciosa e ela estaría ilusionadísima”.
Modesto Martínez Pillado aproveitou para lembrar anécdotas vividas coa señora Lola nos seus tempos de xogador para ilustrar o seu moito carácter. Da súa vida persoal menciou que “pasou moitas na vida e tivo que facer moitas renuncias” ao tempo que afirmou que “a señora Lola seguramente estará por aquí neste intre”. Pola banda, Montse Fajardo fixo fincapé en que esta intervención artística “encarna moi ben o espírito do programa A memoria das mulleres porque foi unha muller que destacou, a través dun traballo moi humilde, nun mundo moi masculinizado”. Por último, Lupe Murillo afirmou “a señora Lola foi unha institución no noso clube e é importantísimo que sexa valora e respectada” e que “o seu amor polas cores do clube lle deu un plus ao seu traballo”.
Ao acto, ademais das persoas que interviron, tamén asistiron os portavoces dos grupos da corporación municipal, familiares de Dolores Calviño, as tres propietarias do edificio que acolle o mural, o presidente da Asociación veciñal do Burgo, Manuel Lavía, o responsable do arquivo do Diario de Pontevedra, Ramón Rozas, membros do Pontevedra CF como Manolo Barreiro e Rafa Vidal, e representantes de agrupacións de siareiros.