O Concello de Bueu e a Asociación Galega de Apicultores poñen en marcha de novo varias charlas informativas sobre a problemática social da vespa velutina e como está afectando esta aos diversos municipios, dado o seu espallamento dos últimos tempos. Así, segundo o concelleiro de medio ambiente, Adrián Ferrer, “estas reunións buscarán concienciar á veciñanza e ás diversas asociacións sobre a importancia do trampeo para erradicar esta lacra que atenta contra a natureza”. Nelas entregarase o material ás persoas que xa teñen trampas e buscarase contar con máis colaboradores/as.
As charlas arrancarán o 12 de febreiro na Casa do Pobo de Beluso e continuarán o 13 na Casa da Aldea de Meiro, o 18 no Centro Sociocultural de Cela e o 22 no Centro Social do Mar de Bueu, todos os días a partir das oito e media da tarde.
José María Bello, delegado de AGA Morrazo, será o encargado de explicar o método de elaboración de trampas caseiras e repartirá material didáctico. Desde a asociación insisten en que é importante a implicación da cidadanía para atallar esta problemática social, pois como di o lema da campaña “Convives ou combates, ti elixes”.
