Mañá xoves 9 de maio coñeceranse aos gañadores/as dos certames Ben Veñas Maio! deste ano das distintas categorías: videoclip musical, fotografía, banda deseñada, narración curta, poesía e curtametraxes. Será na gala de entrega dos premios cando se desvelen os nomes dos galardoados.
A gala terá lugar no Teatro Principal, ás 20.30 horas e contará coa actuación musical de “Limbo”, do IES A Xunqueira. A entrada é libre.
Ben veñas, Maio! é un proxecto que promove a Concellería de Normalización Lingüística xunto cos equipos de normalización (ENL) dos institutos de Pontevedra co fin de promover o uso do galego entre a mocidade, a través das artes. Unha mostra de teatro escolar e seis certames de creación forman o programa, que este ano trouxo como novidade a categoría de videoclip musical, froito da reformulación do certame musical.
Ben veñas, Maio! está dirixido ao alumnado de ESO, ciclos formativos e bacharelato dos centros públicos de Pontevedra.
