Nestes días está distribuíndose información de afeccións ao tráfico motorizado polos lugares do centro urbano nos que decorrerán as distintas carreiras do mundial Multisport que terán lugar a partires do día 27. En concreto, as que afectan a varias rúas do centro histórico, que quedarán inhabilitadas para ir en coche ou moto. Se ben o percorrido das carreiras é distinto no interior do Centro Histórico, as afeccións viarias serán moi semellantes.
Só dous días veranse algunhas rúas cortadas: os sábados 27 de abril (mañá e tarde) e 4 de maio (só pola tarde), cando as carreiras a pé entrarán no centro histórico para percorrer rúas e prazas, un dos lugares preferidos polos triatletas. A diferenza doutras ocasións, a rúa Cobián Roffignac quedará aberta, pero non como rúa de paso, senón só para servizos de residentes ou garaxes, con saída por Santa Clara e Barcelos. Tanto Cobián Roffignac como Cruz Vermella e Irmáns Sobrino Buhigas quedarán cortadas.
Pola zona do mercado, os arredores desta instalación quedarán libres, con accesos desde a Avenida de Bos Aires, vía que se cortará preto da Ponte de Santiago. Tanto Tirantes como Santiago quedarán cortadas, porque por elas vai o circuíto deportivo. As conexións entre o Estadio do CGTD e o centro histórico realízanse a través das rúas Padre Gaite e Padre Fernando Olmedo, a avenida de Bos Aires (entre Tirantes e Santiago) e os novos treitos peonís de Cruz Vermella.
