O Concello de Bueu vén de recibir unha comunicación da Consellería de Presidencia da Xunta de Galicia para mellorar a accesibilidade no Pavillón Municipal Pablo Herbello. A actuación, cun proxecto orzamentado en 28.200 €, permitirá a construción dunha pasarela que unirá o baixo co primeiro andar, a fin de que as persoas con dificultades de mobilidade poidan acceder a calquera evento deportivo. A Xunta asumirá o 70 % da actuación, é dicir 19.740 €.
A actuación consistirá na colocación dunha pasarela dende a intersección de Staffan Mörling e a rúa A Pedra e vai ter un tramo exterior e outro interior. Segundo o proxecto, elaborado polo arquitecto municipal, a pasarela exterior abarcaría unha superficie de 35 metros cadrados, e a interior, 29,4 metros cadrados.
A pasarela será metálica e colocarase en voladizo e anclada á estrutura vertical da nave existente, repartida en dúas metades. Así, a parte exterior irá inclinada desde a rasante da rúa de A Pedra ata as gradas superiores, e a parte interior discorrerá horizontalmente desde o centro da nave ata o graderío.
Últimas obras no pavillón
Con esta actuación, o goberno local segue mellorando o Pavillón Municipal, espazo no que se realizaron diversas obras nos últimos anos. Así, por exemplo, mellorouse a instalación de auga quente e fría nos seus vestiarios, elimináronse as filtracións no interior do pavillón, construíuse un almacén, instalouse unha caldeira de pellets que permitiu un aforro enerxético de preto do 40%, colocáronse novos asentos no graderío, e substituíronse as luminarias por outras de tipo LED, co que se aumentou a capacidade lumínica do espazo ao tempo que se experimentou unha redución no consumo eléctrico.
