Callos ao xeito tradicional, fidegua de gambas, crema de mariscos, fabada asturiana, fabes de Lourenzá, garbanzos con costela de porco ou frixoles, entre outras especialidades culinarias, poderán degustarse este venres, 1 de febreiro, nunha nova xornada da Ruta das Tapas que, nesta ocasión, está dedicada á gastronomía de culler.
O evento, no que participan catorce establecementos hostaleiros, foi presentado este mediodía no Bar Don Paco, nun acto ao que asistiron os concelleiros de Turismo e Cultura, Manuel Dacal e Diego Fernández, respetivamente; a xerente do Centro Comercial Aberto, Noelia Mares, e representantres dos mesóns, bares e restaurantes integrados nesta iniciativa.
Manuel Dacal amosou o seu agradecemento aos hostaleiros, ao CCA, á adega Pazo Tizón e ás demáis entidades e marcas comerciais que fan posible esta demostración da gastronomía local, que da vida á hostalería e ao Carballiño, según dixo o concelleiro. Tamén se referiu á oportunidade de que esta nova xornada se lle dedique aos pinchos de culler, xa que estamos no tempo indicado para isto. E por iso convidou aos veciños e visitantes a achegarse este venres á vila e visitar os establecementos integrados para degustar os seus pinchos.
Noelia Mares recordou que a consumición dun pincho conleva a posibilidade de obter premios directos, e que na app “quedamosdetapas” ofrécese toda a información da oferta de cada un dos establecementos. Así mesmo, fixo fincapé unha vez máis na gran variedade e calidade das tapas que elabora a restauración carballiñesa, e que se poderán degustar a partir das oito da tarde deste próximo venres.
Finalmente, o xerente do local anfitrión, en nome de todos os hostaleiros, invitou ao público a participar nesta ruta para degustar nos catorce locais participantes uns pinchos moi apropiados para este tempo de inverno.
